An anthology of poems by Raghu

రఘు కవిత్వం

*********

కలలు 

ఆత్మలు స్నానం చేసే చెరువులు

వాటిని అరకొర నిద్రలతో నింపొద్దంటాను

సరిపోని నిద్రలు 

పొట్టిగుడ్డతో కుట్టిన జుబ్బాలంటాను 

********

ప్రేమలో ఉన్నప్పుడు కళ్ళు స్థిరాకాశాల్లా కనబడి

ఇంకే కాంతిపుంజాలు వద్దంటాయి 

సొరంగాల చీకట్లున్నా మిరమిట్లు గొలుపుతాయి 

తూచలేని విశ్వాసం తొణికిసలాడి 

ఇంద్రనీలాలు పట్టుదుప్పటిలా కప్పుకుంటాయి

కాలాన్ని కొమ్మ చేసి

కుదుపు కుదుపుకు తుళ్ళిపడే తుమ్మెదలౌతాయి

********

మనసనేది లేకుంటే మనం కేవలం

గడ్డి మేసే మందలం

వెన్నెల మింగని పక్షులం

అక్కడ మనం తలెత్తి చూడని అంతరిక్షం 

ఎవరూ రాయని ప్రశ్నపత్రం